Vaksina dy-në-një e Moderna-s për gripin dhe Covid kalon prova të avancuara

Kompania e barnave Moderna thotë se vaksina e saj e kombinuar e gripit dhe Covid, e cila synon dy sëmundjet në një injeksion të vetëm, ka kaluar një pjesë jetike të kontrolleve shkencore të fazës përfundimtare.

Prova e fazës së tretë tregon se vaksina armatos trupin me antitrupa mbrojtës.

Dhe këtë e bën po aq efektivisht sa vaksinat e veçanta të gripit dhe Covid, sugjerojnë rezultatet.

Më pak injeksione do të ishin më të përshtatshme dhe më të thjeshta, thotë Moderna.

Shefi ekzekutiv Stephane Bancel i tha BBC News se ai shpresonte se vaksina e mesazherit të acidit ribonukleik (mRNA) mund të vihej gjerësisht në dispozicion në 2026 – ose ndoshta, 2025.

“Ne jemi shumë të kënaqur për rezultatet, sepse është hera e parë në botë që një kompani është në gjendje të tregojë rezultate pozitive të fazës së tretë duke kombinuar në një dozë të vetme vaksinën e gripit dhe Covid-it”, tha ai.

“Ju merrni një dozë, një gjilpërë”, që do të thoshte “lehtësi dhe qetësi shpirtërore për konsumatorin”.

Konkurrentët Pfizer dhe BioNTech po testojnë një vaksinë të ngjashme mRNA dy në një kundër gripit dhe Covid.

Në provën e vazhdueshme të Moderna-s, futja e mRNA-1083 prodhoi një përgjigje imune më të lartë sesa vaksinat krahasuese të licencuara.

Përputhej ose përmirësoi vaksinat e aprovuara aktualisht të gripit, duke përfshirë ato me doza të larta të dizajnuara për të moshuarit.

Dhe ishte më mirë se përforcuesi ekzistues i Covid-it i Moderna-s, Spikevax, për ta bërë trupin të prodhonte antitrupa kundër sëmundjeve – ndoshta sepse ishte krijuar për të luftuar variantet më të fundit që qarkullonin nëpër botë, tha zoti Bancel për BBC News në një intervistë.

Rezultatet janë nga 8,000 vullnetarë – të gjithë të moshës mbi 50 dhe gjysma mbi 64 vjeç.

Moderna tha se ishte përqendruar te njerëzit e moshuar sepse ata kishin më shumë gjasa të vazhdonin t’u ofroheshin vaksina kundër Covid.

Por, në fund të fundit, ajo planifikon t’u ofrojë të rejat edhe të rinjve.

Çdo efekt anësor ishte përgjithësisht i butë – pak dhimbje ku gjilpëra hyri në lëkurë dhe pak lodhje – si me vaksinat e zakonshme.

Kompania planifikon t’i prezantojë gjetjet në një konferencë mjekësore, si dhe t’i dërgojë ato për botim.

Ajo po zhvillon gjithashtu një vaksinë mRNA kundër një sëmundjeje të quajtur citomegalovirus, për të cilën shpreson të ketë rezultate të provës në fazën e vonë këtë vjeshtë.

Aktualisht, nuk ka asgjë për të mbrojtur gratë shtatzëna dhe foshnjat e tyre të palindura kundër CMV.